Mar 8 | KMU | STEP | Nago yupa kasagoꞋya veaꞋmoꞋya alitalu huꞋya maiyana nesaya yana omalegeno YisasiꞋa agaiꞋaenema tokaeꞋya nemaiya anagafe ke higeꞋya ageno mage hie “Mani veala tagufa (3) yupa nagaiꞋene mainageno nesaya kaveꞋamia omalea yafe nahau huneꞋamatoe.

Mark 8

YisasiꞋa fo tauseniꞋa (4,000) vaya kavela amamine.

1 Nago yupa kasagoꞋya veaꞋmoꞋya alitalu huꞋya maiyana nesaya yana omalegeno YisasiꞋa agaiꞋaenema tokaeꞋya nemaiya anagafe ke higeꞋya ageno mage hie “Mani veala tagufa (3) yupa nagaiꞋene mainageno nesaya kaveꞋamia omalea yafe nahau huneꞋamatoe. 3 NagoꞋa veala ayaꞋaya kotegati emainagi havigu amatalesugeꞋya katega neꞋvisageno amakatesigeꞋya amaugetunatu huꞋya takatiyafena nonahaiye.” huno hamapaiye. 4 YisasiꞋenema tokaeꞋya nemaiya anagaꞋmoꞋya mage huꞋya hapaiye “Mauna kola vaya omai kolagi hanateti maya alita ani veaꞋnea amamisune?” huꞋya havigae. 5 Hageno YisasiꞋa mage huno hamavige “Tamakaya naꞋmagiꞋa maya hane?” huno higeꞋya mage hae “Tagaipina seveniꞋa (7) mayaꞋage hane.” huꞋya hapaiye.

6 Hageno YisasiꞋa muki veafena “Mopale maiho.” huno higeꞋya mopale mainageno YisasiꞋa ani seveniꞋa (7) maya alino Anumayamotega muse huno havigeteno aposite aposite huteno agaiꞋaenema tokaeꞋya nemaiya anagala amamigeꞋya mukiꞋa veapina vaya kaimainae. 7 Nagoke okasi noyame kanoꞋa hanegeno YisasiꞋa Anumayamotega ani noyamehe muse huteno “Amamite amamite hiho.” huno higeꞋya vaya kaimainae. 8 KaigeꞋya mukiꞋa veaꞋnea nageno amamu higeꞋya atalaya maya atupayaga YisasiꞋenema tokaeꞋya nemaiya anagaꞋmoꞋya alitalu huteꞋya seveniꞋa (7) kupi aihavatemainae. 9 Ani kaveꞋma naya veneꞋnea fo tauseniꞋa (4,000) vayaꞋmoꞋya nemainae. Netageno YisasiꞋa humategeꞋya umainae. 10 Utageno YisasiꞋa agaiꞋaenema tokaeꞋya nemaiya anagaꞋene tipi kalefi haisaga humaiꞋya Talamanuta kumatega umainae.

“TokiyaꞋage avame yana hugeta agamano.” huꞋya hae.

11 Falasia vayaꞋmoꞋya Yisasite eꞋya agaiꞋene ke vaiꞋya ayevataga hisaya yafe mage huꞋya hae “Kagaya ikapinagati tokiyaꞋage avame yana hugeta agamano.” huꞋya hae. 12 Hageno YisasiꞋa aipa havino kanaꞋage huteno mage huno hie “NaꞋa higetama meni kanafima mainaya veaꞋmogatama tokiyaꞋage avame yafena nahavinegae? Tamage tamahapaisua kea haviho meni kanafima mainaya veaꞋmogatamina tokiyaꞋage avame yana tamaveotigahue.” huno hie. 13 Huteno neꞋamataleno tipi kalefi haisaga humaino atu faliga ugahe umaine.

Falasia vayaꞋene HelotiꞋene nehaya kea kaihamema halenegia yate huvame ke humaine.

14 YisasiꞋenema tokaeꞋya nemaiya anagaꞋmoꞋya tima lakaeꞋya vayana amakekaniꞋya nagoke maya kanoꞋa aliꞋya umainae. 15 AliꞋya vayanagino YisasiꞋa mage huno hamapaiye “Tamakaya Falasia vayaꞋene HelotiꞋene amakupima hanea yana agelama ohuneꞋya amavayaleti havigema nehaya yamoꞋa kaihamemo halenegia avamete huno halegino alakefa hisia yafena kaꞋye ho.” huno hie. 16 HigeꞋya ani vayaꞋmoꞋya amakaiꞋamia huge havige nehuꞋya mage hae “Tagaya maya oꞋalita emainona yafe nehie.” huꞋya amakaiꞋamia hae. 17 Hageno YisasiꞋa ani vayaꞋmoꞋya haya kea ago haviteno mage hie “NaꞋa higetama ‘Kavetia alita omenone.’ hutama tamakaitamia huge havige nehae. Tamakesa havilama hutama ohavinao? TamakuꞋamoꞋa tilemainegetama nohavio? 18 Tamaulaga haneanagi agelama nohao? Tamakesa haneanagi havilama nohao? FaefuꞋa (5) maya aliꞋna apositeꞋna faefu tauseniꞋa (5,000) veyagama amaminoa yafena tamakekanitama mainao? NaꞋmagi kupi atupatapa aimalageno havatemaine?” huno hamavigegeꞋya “TuelufuꞋa (12) kule.” huꞋya hapaiye. 20 Hageno mage huno hie “SeveniꞋa (7) maya aliꞋna apositeꞋna fo tauseniꞋa (4,000) vaya amamugeꞋya neteꞋya naꞋmagi kupi atupatapa aigeno havatemaine?” huno hamavigegeꞋya “SeveniꞋa (7) kule” huꞋya hapaiye.” 21 Hageno mage huno hie “NaꞋa higetama nohaviye?” huno hamavige.

YisasiꞋa nagola aulaga asu humai kanoa Petesaita kumate alino kanale hutene.

22 Petesaita kumate uvaꞋyi hageꞋya veaꞋmoꞋya nagola aulaga asu humainea kanoa avaleꞋya Yisasite neꞋeꞋya mage huꞋya hae “MusekaꞋa nehunagi augafale avate huo.” huꞋya hae. 23 Hageno YisasiꞋa aulagama asu humai kanoa ayate alino kumala ataleno avaleno malaga viaꞋamo aulagafi avetuꞋna heteno aya nemaleno mage huno havige “Nago yana neꞋagano?” huno havige. 24 Higeno agesaga huno ageana higeno mage huno hie “Veala neꞋagogeꞋya yosa kana huꞋya vaiyatete nehae.” huno hie. 25 Higeno YisasiꞋa nagoꞋene aniꞋa huno ayana aulagale malegeno aulagamoꞋa kanale higeno agemaine. Aulaga age haleno muki yana kanaleꞋya huno agemaine. 26 Agegeno YisasiꞋa mage huno hie “Ma kumatela oꞋuka eteka nokalega vuo.” huno hie.

PitaꞋa hufalote huno “YisasiꞋa Anumaya KotiꞋa taugafa aligatigahema hutenea kanoe.” huno humaine.

27 YisasiꞋa agaiꞋaenema tokaeꞋya nemaiya anagaꞋene Sisalia Filipai kotega hanea kumate ugahe katega neꞋuno mage huno hamavige “VeaꞋmoꞋya nagaifena taꞋe huꞋya nehae?” huno hamavige. 28 HamavigegeꞋya kenonaꞋa mage huꞋya hae “NagoꞋa veaꞋmoꞋya kagaifena ‘Tima fale neꞋamatea YoniꞋe.’ huꞋya hageꞋya nagoꞋa veaꞋmoꞋya ‘Ilaiya maine.’ huꞋya hageꞋya nagoꞋa veaꞋmoꞋya ‘Anumaya Kotina aune kanoꞋa maine.’ huꞋya nehae.” huꞋya hapaiye. 29 Hapaigeno YisasiꞋa mage huno hamavige “Tamakaya nagaifena taꞋe hutama nehae?” huno hamavigegeno PitaꞋa kenonaꞋa mage huno hie “Kagaya Kalaisigae Anumaya KotiꞋa taugafa aligatigane huno hugatenea kano mainane.” huno hie. 30 Higeno YisasiꞋa amaumono maleno mage huno hie “Mani kea nagoꞋa veala hamaopaiho.” huno humaine.

YisasiꞋa “FaliteꞋna hetigahue.” huno humaine.

31 Ani yupa YisasiꞋa agaiꞋaenema tokaeꞋya nemaiya anagafena haenagama falote hisia yafe aepa heno hamapaino mage huno hie “Nagaya ikapinagati emainoa kanoa vayaꞋmo natenea kanomoꞋna tusiya huꞋna nagata yana alisugeno Yuta vayatamaene mono note kava vayaꞋene kahegi kema havilinaya anagaꞋene amakaveꞋno hunateꞋya nahaesageꞋna falisugeꞋya komufi hevainatesageno naugafamoꞋa tole yupa maitenageꞋna tagufa kanale falimainesufitila eteꞋna hetigahue.” huno hamapaiye. 32 Hufalote huno hamapaigeno PitaꞋa Yisasina faitega avaleno mage huno mo hapaiye “Kagaya ani kea ohuo.” huno hie. 33 Higeno YisasiꞋa maiyahae huno nagoꞋa agaiꞋaenema tokaeꞋya nemaiya anagala amaketeno Pitafe keamakino mage huno hie “Sataniga mai halenato kagaya Anumaya Koti havimainea aguꞋagesa kanaleꞋya huka nohavinagi vayaꞋmoꞋya kahapaiya amaku amakesa nehavine.” huno hie.

34 Huteno kasagoꞋya alitalu haya veaꞋnene agaiꞋaenema tokaeꞋya nemaiya anagafeꞋene ke higeꞋya ageno mage huno hamapaiye “NagoꞋa veaꞋmoꞋya nakave visaya amakesa havinuꞋyahena amaugafama aliꞋya hai yana amakaveꞋno huteteꞋya nagaiꞋma nagata aisigeꞋnama falisua avamete amakesa haviteꞋya yafaga yosa kofiꞋya nakave visae. 35 NagoꞋa veaꞋmoꞋya hamaimuꞋma hanesigeꞋya mai yaꞋamima atafa hutalako hisagenoꞋa ani yamoꞋa fanane hugahianagi nagoꞋa veaꞋmoꞋya nagaife huꞋya nagai kanale mono kema hamapaisaya yafema mai yaꞋamiene hamaimuꞋamiene atalesagenoꞋa ani mai yaꞋami aligatisigeꞋya agola maigahae. 36 Nago kanomoꞋa mukiꞋa ma mopafi afeno yama alisia yafe faliteno agola maige maige hisia haimuꞋa atalesiana alimainea mone afeno yamoꞋa hanaꞋa huno haꞋmaegahie? AꞋao haꞋomaegahie 37 Falitesigenofena agola maige maige hisia haimula eteno alisia yafe mukiꞋa ma mopafi mone fenoꞋyana afaꞋa atalegahianagi aya ohugahie. 38 NagoꞋa veaꞋmoꞋya meni kanafina kefo yama nehaya veaꞋnene, Anumaya Koti kema ataleteꞋya alu kate neꞋvaya veaꞋnene, maineꞋya nagai kene nagaiꞋnienefema huꞋya ‘AoteꞋyamaꞋae.’ hunatesageꞋna nagaya ikapinagati emainoa kanoa vayaꞋmo natenea kanomoꞋna esua yupa Nenafana tokiya hale yamaꞋaene alu aotage ensole anagaꞋmoꞋyaene eteꞋna esuana aniꞋa huꞋna ani veaꞋnehena nagaye huꞋna ‘TamahaoteꞋyatamie.’ huꞋna humategahue.” huno humaine.